Fetin'ny Fahazavana - Fotoan'ny Paka

Fetin’ny FAHAZAVANA Fotoan’ny Paka

Sosokevitra nipoirana tamin’ny “Couronne d’Advent”

(fanao mandritra ny Fotoan’ny Fiavian’ny Tompo)

Raha hitan’ny pretra tomponandraikitra fa mety,

dia azo tanterahina mandritra ny Fankalazana ny Eokaristia,

indrindra amin’ireo fankalazana be tanora sy ankizy

Zavatra ilaina :

Ny Jiron’ny Paka izay arehitra isaky ny fankalazana lehibe mandritra ny Fotoan’ny Paka, izany hoe, hatramin’ny Alina fiaretan-tory hankalazana ny Paka ka hatramin’ny Alahady Pantekôty;

Jiro valo manodidina ny Jiron’ny Paka, ilazana ny Herinandro fito fankalazana ny Paka, miampy ny Alahady Pantekôty [(7x7)+1]=50;

Arehitra tsirairay isaky ny alahady ireo jiro ireo ka ny Jiron’ny Paka no ampirehetana azy; ny alahady fankalazana ny Paka no ampirehetana ny jiro voalohany, sns;

Azo asiana fanentanana kely alohan’izany ka indro misy torohevitra, izay nalaina tamin’ny Evanjely androtr’io (taona D):

Ø Alahady Paka (Ny Jiron’ny Paka ihany no efa mirehitra): Eto anoloantsika ny Jiron’ny Paka narehitra tamin’ny Alina Fiaretan-tory teo iny, izay manambara ny Fahazavan’i Kristy tafatsangan-ko velona ; mirehitra ao am-pontsika ny fahazavan’ny Hafaliana, ka ndeha omentsika voninahitra Izy Tompo (Arehitra ny jiro voalohany sady atomboka ny Voninahitra anie).

Ø Alahady Faharoa (Efa mirehitra ny Jiron’ny Paka mbamin’ny jiro iray): Tompo sy Andriamanitra i Jesoa tafatsangan-ko velona ; mirehitra ao am-pontsika ny fahazavan’ny Finoana, ka ndeha omentsika voninahitra Izy Tompo. (Arehitra ny jiro faharoa sady atomboka ny Voninahitra anie).

Ø Alahady fahatelo (Efa mirehitra ny Jiron’ny Paka sy ireo jiro roa teo aloha): Ny Eglizy no isehoan’i Jesoa tafatsangan-ko velona izao, dia ny Eokaristia Sakafo mampiray no ahitana Azy ; mirehitra ao am-pontsika ny fahazavan’ny Fiombonan’ny mpino, ka ndeha omentsika voninahitra Izy Tompo. (Arehitra ny jiro fahatelo sady atomboka ny Voninahitra anie).

Ø Alahady fahefatra (Efa mirehitra ny Jiron’ny Paka sy ireo jiro telo teo aloha): Mpitandrina mahatoky i Jesoa: mahalala antsika tsirairay ary mirehitra ao am-pontsika ny fahazavan’ny Fahatokisana Azy, ka ndeha omentsika voninahitra Izy Tompo. (Arehitra ny jiro fahefatra sady atomboka ny Voninahitra anie).

Ø Alahady fahadimy (Efa mirehitra ny Jiron’ny Paka sy ireo jiro efatra teo aloha): Ny fifankatiavana toy ny nitiavan’i Kristy antsika no didy vaovao ary mirehitra ao am-pontsika ny fahazavan’ny Fitiavana, ka ndeha omentsika voninahitra Izy Tompo. (Arehitra ny jiro fahadimy sady atomboka ny Voninahitra anie).

Ø Alahady fahenina (Efa mirehitra ny Jiron’ny Paka sy ireo jiro dimy teo aloha):Ny Fanahy Masina no mampahafantatra antsika ny fifankatiavan’ny Ray sy ny Zanaka ary mirehitra ao am-pontsika ny Herin’ny Fanahy Masina, ka ndeha omentsika voninahitra Izy Tompo. (Arehitra ny jiro fahenina sady atomboka ny Voninahitra anie).

Ø Alahady fahafito (Efa mirehitra ny Jiron’ny Paka sy ireo jiro enina teo aloha): Iray tokoa i Jesoa sy ny Rainy. Andriamanitra dia Fitiavana ary mirehitra ao am-pontsika ny fahazavan’ny Firaisan-kina, ka ndeha omentsika voninahitra Izy Tompo. (Arehitra ny jiro fahafito sady atomboka ny Voninahitra anie).

Ø Alahady Pantekôty (Efa mirehitra ny Jiron’ny Paka sy ireo jiro fito teo aloha): Tsy misaraka ny fitiavana an’i Jesoa sy ny fandalàna ny marina ary mirehitra ao am-pontsika ny fahazavan’ny Fahamarinana sy ny Fahalalana, ka ndeha omentsika voninahitra Izy Tompo. (Arehitra ny jiro fahavalo sady atomboka ny Voninahitra anie).