Hasivian'andro fiomanana ny fankalazana ny Fo masin'i Jesoa

Hasivian’andro fiomanana ny Fankalazana ny Fo Masin’i Jesoa

Fandrindrana sy fandrafetana: Razokibe José, scj

Ho an’ny Ankohonampiainana Dehonianina eto Madagasikara sy ny mpiara-dia aminy.

Fanavaozana sy fanitsiana an’ilay naseho tamin’ny mey 1997.

Noheverina mba hatao mandritra ny fitsaohana ny Sakramenta Masina.

Na dia tsy hisy Tsodranon’ny Sakramenta Masina aza, dia azo atao daholo ireo tonombavaka voatondro,
araka izay hitan’ny mpandraharaha eo an-toerana fa  mety.

1. Inty aho tonga…

Ao amin’ireto teny ireto “Inty aho”... no misy ny lalam-piantsoana antsika manontolo sy ny tanjona kendrentsika ary ny adidy amam-panomezatokintsika (Léon Dehon).

Fanaingana

Nony niditra tamin’izao tontolo izao ny Kristy dia nanao hoe : « tsy nilainao ny sorona sy ny fanatitra, fa namboatra vatana ho anay ianao ; tsy sitrakao ny sorona dorana sy ny sorona noho ny ota, ka hoy aho hoe : inty aho tonga – fa izao no voalaza ao amin’ny horonam-boky – hanao ny sitraponao, Andriamanitra ô ! Ary ny herin’izany sitrapo izany no nanamasinana antsika, tamin’ny nanoloran’i Jesoa Kristy ny vatany indray mandeha monja » (Heb 10,5-7.10).

Vavaka iombonana (Charles de Foucauld)

Ray ô, mitolo-tena Aminao aho,

ataovy izay tianao hatao amiko

ka na inona na inona hataonao ahy,

dia isaorako Anao.

Vonona amin’ny zavatra rehetra aho

ary manaiky izay rehetra miseho.

Koa rehefa tanteraka ny sitraponao amiko,

sy amin’ny voaary rehetra,

dia tapi-java-nirina aho ry Andriamanitro.

Apetrako eo am-pelatananao ny fanahiko.

Omeko Anao izany, ry Andriamanitra,

miaraka amin’ny fitiavana eran’ny foko,

satria tiako Ianao,

sady ho fanehoako ny fitiavana ato amiko,

no anolorako tena amim-pitokiana tanteraka Aminao,

fa Raiko Ianao.

Amen.

Mba ivavahana sy andinihana mandritra ny Fitsaohana

Heb 10,1-10 : Inty aho tonga hanao ny sitraponao

Mat 9,9-13 : Ny famindram-po no sitrako fa tsy ny sorona

Sal 39 : Inty aho tonga…

Torohevitra momba ny hira

Ataovy mikatsaka – FV 531 ; VH 526 ; VIA 532

Ny Teninao… no mamiko – FV 255 ; VH 276

Atolotro ho anao – FV 535 ; VH 780

Atolotro anao Andriamanitra ô – FV 367 ; VH 732

Hoy i Kristy : tsy izay miantso hoe Tompoko – FV 461 ; VH 353 ; VIA 247

Alohan’ny tsodranon’ny Sakramenta Masina

Tsy nisalasala hanolotra ny Ainao ho fitiavana anay sy ny olon-drehetra

Ianao ry Jesoa Tompo.

Avy tamin’ny lanivoanao nisokatra teo ambony Hazofijaliana,

dia nisy ra sy rano nikoriana.

Atreho àry ny fianakavianao tafavory eto anatrehanao.

Navotanao tamin’ny ranon’ny Batemy Izy,

ary nofahananao ny Vatana aman-dRanao ao amin’ny Eokaristia.

Hamasino izahay ho mendrika ny Fonao Andriamanitra.

Anao izahay anio sy ho mandrakizay.

Ataovy mahery noho ny fahafatesana

ny fitiavanay mbola mitsilopilopy.

Enga anie izahay ho tena mpianakavy marina, ka hifankatia.

Omeo hamoram-po àry izahay hahaizanay mandray ny hafa.

Ka ny fihavananay anie ho seha-pitsaohana sy ho fisaorana Anao ;

ary honenan’ny famelan-keloka ombam-piadanana.

Tariho hankany Aminao sy ny Fonao ny olombelona rehetra ;

ka ataovy tonga fianakaviana iray

noho ny fitiavana ny Fonao

sy ny Herin’ny Fanahinao Masina,

ho voninahitr’Andriamanitra Ray.

Amen. 

Hira fihobiana ny Eokaristia sy vavaka

Ry Andriamanitra izay nanavotra ny olombelona rehetra tamin’ny alalan’ny misterin’ny Pakan’i Kristy ô, arovy ao aminay ny asan’ny fitiavanao. Ary enga anie izahay mba ho afa-mankalaza ny misterin’ny famonjena anay amim-pomba marina hiotazanay ny vokatr’izany. Amin’ny alalan’i Jesoa Kristy Tomponay. Amen.

Fihobiana aorian’ny tsodrano

A/ Voninahitra sy dera anie ho anao, ry Jesoa Tompo. - /Voninahitra...

            Ry Kristy, tonga nofo, A/ Voninahitra…

            Ry Kristy, nohamarinin’ny Fanahy, A/ Voninahitra…

            Ry Kristy, banjinin’ny Anjely, A/ Voninahitra…

            Ry Kristy, torîna amin’ny tsy mpino, A/ Voninahitra…

            Ry Kristy, inoana eran-tany, A/ Voninahitra…

            Ry Kristy, ankalazaina am-boninahitra, A/ Voninahitra…

 2. Ho tonga anie ny fanjakanao

Ny Fanjakan’ny Fon’i Jesoa eo amin’ny fiarahamonina dia Fanjakan’ny fahamarinana, ny fitiavana, ny famindrampo ho an’ireo madinika sy manetry tena ary ireo mijaly (Léon Dehon).

Fanaingana

Misaotra anao izahay, Tompo ô, Andriamanitra Tsitoha izay ankehitriny sy taloha, fa naneho ny herinao lehibe Ianao, ka manjaka izao. Lasan’ny Tompontsika sy ny Kristiny ny fanjakan’izao tontolo izao ka hanjaka mandrakizay mandrakizay Izy ; Matahora an’Andriamanitra ; omeo voninahitra izy, fa tonga ny andro fitsarany. Mitsaoha an’ilay nahary ny lanitra sy ny tany, mbamin’ny ranomasina sy ny loharano » (Apok 11,17.15 ;14,7).

Vavaka iombonana (Apok 12,10-12 ;15,3-4)

Ankehitriny dia an’Andriamanitra ny famonjena sy ny hery ary ny fanjakana ;

an’ny Kristiny koa ny fahefana,

fa efa resy ilay mpiampanga ny rahalahintsika,

dia ilay miampanga azy andro aman’alina eo anatrehan’Andriamanitsika

Nandresy azy ireo koa ny rahalahintsika

noho ny ran’ny Zanakondry sy ny Teny nambarany

ary ny fitandroany ny ainy na dia ho faty aza Izy.

Koa mifalia, ry lanitra, mbamin’ireo monina ao aminy.

Lehibe sy mahagaga ny asanao, ry Tompo,

Andriamanitra Tsitoha !

Marina sy mahitsy ny lalanao,

ry Mpanjakan’ny taona mandrakizay

Iza no tsy hatahotra sy hankalaza ny Anaranao, Tompo ô ?

Fa Ianao irery no masina,

ka ho avy hiankohoka eo anatrehanao ny firenena rehetra,

satria miseho miharihary ny fitsaranao !

Mba ivavahana sy andinihana mandritra ny Fitsaohana :

Jo 18,33-40 : Moa mpanjaka va ianao ?

1 Ko 15,20-28 : Atolony amin’ny Ray ny fanjakana

Sal 96 : Manjaka ny Tompo, miravoa ny tany !

Torohevitra momba ny hira :

Handohalika amin’ny Anaran’i Jesoa – FV 264 ; VH 328 ; VIA 126

Manjaka Andriamanitra ! Aleloia ! – FV 333 ; VH 452 ; VIA 94

An’Ilay Zanakondrin’Andriamanitra anie – FV 282 ; VH 450 ; VIA 118

Amin’ny Anaran’i Jesoa – FV 327 ; VH 333 ; VIA 84

Ankavanan’Andriamanitra – FV 401 ; VH 706

Ry Tomponay, Mpanjakanay rehetra – FV 376 ; VH 746

Izao e no hiseho – FV 455 ; VH 327 ; VIA 189

Alohan’ny tsodrano : vavaka ho fampihavanana

Hankalazaina anie Ianao Ry Fon’i Jesoa

izay tonga hampihavana ny olon-drehetra

amin’ny Rainao sady Rainay.

Ianao no Teny nanavotra ny olona.

Tanana mitsotra mankany amin’ny mpanota ;

lalana hahatongavanay any amin’ny tena fiadanana.

Nofafanao tamin’ny Ranao ny fahotan’izao tontolo izao.

Ianao no fiadananay sy fampihavanana ho anay.

Mihanta Aminao izahay, ry Fo feno fangorahana :

mba esory ao am-ponay

izay mety ho endri-pialonana sy fankahalana.

Omeo anay ny Fanahinao Masina :

holevoniny anie ny antony mahatonga anay hisaratsaraka.

Ary haoriny ao anatin’ny Fitiavana lehibe

sy mendrika indrindra anie izahay

ka ho feno hafaliana ny fonay,

hihavananay dieny izao,

ary hahafahanay manolotra tsy misy fihatsaram-belatsihy

ny Sorona mampihavana anay amin’ny Ray.

Amen.

Hira fihobiana ny Eokaristia sy vavaka

Enga anie, ry Tompo, ny Sakramentan’ny Eokaristia izay tianao hanovozanay hery hanenika ny fonay amin’ny fitiavana Anao mba hampiredareda ny fanirianay ny haren’ny lanitra. Amin’ny alalan’i Jesoa Kristy Tomponay. Amen.

Fihobiana aorian’ny tsodrano

A/ Tsarovy izahay rahatrizay

            fa ho avy indray Ianao, ry Jesoa ô - / Tsarovy...

F/ Ianao izay tsy mandà ny fo mivalo – A/ Tsarovy…

F/ Ianao izay nanaiky hatramin’ny fahafatesana – A/ Tsarovy…

F/ Noho ny fonao misokatra

            noho ny tananao voafantsika – A/ Tsarovy…

F/ Voninahitra anie... – A/ Tsarovy…

 3. Hibanjina an’ilay nolefoniny izy ireo

Avy amin’ny Fon’i Jesoa, misokatra eo amin’ny Hazofijaliana, no ahaterahan’ny olombelona amin’ny fo vaovao, entanin’ny Fanahy ary miombona amin’ny mpiarabelona ao amin’ilay ankohonam-pitiavana atao hoe Eglizy (Léon Dehon).

Fanaingana

« Andro fiomanana amin’ny Paka tamin’izay, ary tokony ho tamin’ny ora fahenina ; dia izao no nolazain’i Pilaty tamin’ny Jody : Indro ny Mpanjakanareo. Fa niantsoantso izy ireo nanao hoe : Esory, esory, fantsiho amin’ny hazofijaliana izy. Ka hoy i Pilaty taminy : Dia hofantsihako amin’ny hazofijaliana va ny Mpanjakanareo ? Fa hoy ny lohandohan’ny mpisorona hoe : Izahay tsy mana-mpanjaka afa-tsy i Sezara. Tamin’izay dia natolony azy hofantsihana i Jesoa, ka noraisin’izy ireo izy, dia nentiny. Nentin’i Jesoa ny Hazofijaliany, dia tonga teo amin’ny toerana atao hoe Kalvery izy, na hoe Golgotà amin’ny teny hebrio. Teo no namantsihany azy tamin’ny Hazofijaliana, niaraka tamin’ny roa lahy hafa koa izay nofantsihana teo an-daniny roa, fa i Jesoa teo afovoany » (Jo 19,14-18).

Vavaka iombonana (1 P 2,21-25)

Nijaly ho antsika koa i Kristy,

ka namela fianarana ho antsika, mba hanarahantsika ny diany :

dia izy, ilay tsy nanota akory, na mba niloa-bava hilaza fitaka velively ;

Izy ilay notevatevaina, nefa tsy mba nandrahona,

fa nanolo-tena tamin’ny mpitsara azy tsy an-drariny ;

Izy ilay nitondra ny fahotantsika tamin’ny tenany teo ambony hazo,

mba ho faty isika raha ny amin’ny ota,

fa ho velona kosa amin’ny fahamarinana ;

ary ny dian-kapoka taminy no nahasitrana antsika

Fa efa toy ny ondry nania isika,

ary indro ankehitriny efa tafaverina amin’ny Mpiandry sy Mpitondra ny fanahintsika.

Mba ivavahana sy andinihana mandritra ny Fitsaohana

Jo 19,28-37 : Hibanjina an’Ilay nolefoniny izy ireo

Zak 12,10 ;13,1-2 : Amin’izany andro izany hisy loharano hisokatra

Iz 52,13-53,12 : Nolefonina noho ny fahotantsika izy

Sal 40 : Nanangana ny ombalahin-tongony hamaly ahy ilay namako

Torohevitra momba ny hira

Mitsangàna ka banjino – FV 217 ; VH 449 ; VIA 195

Ry Fo Masin’i Jesoa (and 1.2) – FV 532 ; VH 771

Aoka hanatona ny Tompo – FV 434 ; VH 440 ; VIA 440

Ianareo 'zay lavitra taloha – FV 79 ; VH 298 ; VIA 130

Alohan’ny tsodrano : fanolorantena

Misaotra Anao izahay, ry Ray,

satria sitrakao ny nandraisan’i Kristy Zanakao anjara

amin’ny fahosanay tamin’ny fijalian’ny vatany,

mba hanafaka anay voageja.

Nataonao mitovy aminay Izy

mba ho Mpisorona mpamindra fo

sy mendrika itokisana

hisolo heloka ny vahoakanao mpanota.

Ho amin’izany indrindra no nisedrana Azy mafy,

ka tonga fanalana ny ota tamin’ny alalan’ny Rany nafoiny Izy.

Enga anie, ry Tompo,

mba hiainanay àry ny fiombonany taminay,

mba ho afaka miray aina,

ka manampy ireo tojo sedra tsy eran’ny aina izahay.

Ataovy tsapanay koa ny fahorian’ireo ianjadian’ny tsy rariny

sy ny fahotana ny fiainan’ireo diso lalana.

Ampiraiso amin’ny fanoloran-tenan’i Kristy tonga sorona ny fiainanay ;

amin’izay, dia ho tonga any an-dapanao masina izahay

indray andro any.

Amen.

Hira fihobiana ny Eokaristia sy vavaka

Hanilo anay anie ny finoana  ry Tompo, ary mba hirehi-pitiavana Anao anie izahay, hahafahanay mitsaoka Anao amin’ny fanahy feno fahamarinana ilay inoanay ao amin’io Sakramenta Masina io fa Tompo sady Andriamanitray. Izy ilay velona sy manjaka amin’ny taona rehetra mandrakizay. Amen.

Fihobiana aorian’ny tsodrano

F/ Mpisorona mandrakizay Ianao, ry Jesoa - / Mpisorona...

            Noho ny herin’ny fiainanao, F/ Mpisorona…

            Noho ny fanalalanao tsy sasatra, F/ Mpisorona…

            Noho ny fanoloran-tenanao, F/ Mpisorona…

            Voninahitra anie… - F/ Mpisorona...

 4. Nataony fanjakana mpisorona isika

Ny firaiketana amin’i Kristy dia miseho endrika sy mifantoka ao amin’ny sorom-pitiavan’ny Eokaristia, ka mahatonga ny fiainana manontolo ho sorona masina mandrakizay (Léon Dehon).

Fanaingana

Ho an’ilay tia antsika anie, ka nanasa ny otantsika tamin’ny rany, sy nanao antsika ho fanjakana amam-pisoron’Andriamanitra Rainy, eny, ho Azy anie ny voninahitra amam-pahefana mandrakizay doria. Amen. Indro Izy avy eo amin’ny rahona, ka nahita Azy ny maso rehetra, na dia ny an’ireo nandefona Azy aza ; ary handon-tratra ny firenena rehetra ambonin’ny tany amin’ny fahitana Azy. Eny. Amen. Izaho no Alfa sy Omega, fiandohana sy fiafarana, hoy ny Tompo Andriamanitra, dia ilay ankehitriny sy taloha ary ho avy, mahefa ny zavatra rehetra » (Apok 1,5-8).

Vavaka iombonana (Apok 4,8.11;5,9-14)

Masina, Masina, Masina ny Tompo Andriamanitra,

mahefa ny zavatra rehetra, izay taloha sy ankehitriny ary ho avy.

Ianao, ry Tomponay sy Andriamanitray

no mendrika handray ny haja amam-boninahitra ary fahefana,

fa Ianao no nahary ny zavatra rehetra,

ary noho ny sitraponao ihany no nisiany sy naha-àry azy.

Ny Zanakondry izay voavono

no mendrika handray ny fahefana, ny harena,

ny fahendrena, ny hery, ny haja, ny voninahitra ary ny saotra.

Ho an’ilay mipetraka eo amin’ny seza fiandrianana

sy ho an’ny Zanakondry anie

ny dera sy ny haja

ary ny voninahitra amam-pahefana mandrakizay mandrakizay !

Amen.

Mba ivavahana sy andinihana mandritra ny Fitsaohana

1 P 2,1-10 : Ilay fisoronana vaovao

Jo 1, 29-39 : Indro ny Zanakondrin’Andriamanitra

Sal 7 : Ianao no mamoaka fitsarana marina

Torohevitra momba ny hira

Nanao antsika ho mpisorona – (FV 310 ; VH 333) VIA 406

Jesoa mikaroka mpiasa vaovao – FV 372 ; VH 523

Ny voninahitr’Andriamanitra Ray – FV 328 ; VH 385 ; VIA 88

Ry vahoaka voafidy – FV 245 ; VH 326 ; VIA 134

Efa nomena Ahy ny fahefana –FV 146 ; VH 335 ; VIA 181

Isika no tempolin’Andriamanitra – FV 328 ; VH 413 ; VIA 87

Alohan’ny tsodrano : fanolorantena

Ry Jesoa Kristy Tompo

Mpisorona Avo indrindra sy mandrakizay ô,

mba arotsahy ao aminay

ilay Fanahy maha-mpisorona

izay manokana anay

amin’ny fanavaozana an’izao tontolo izao ao aminao.

Omeo fo vonona lalandava izahay ;

omeo anay ny fitiavanao ny olombelona

izay namoizanao ny ainao sy nitsangananao ho velona.

Ataovy miaina izay torînay izahay.

Hatokanay ho anao anie ny fiainanay manontolo

sy izay fonosin’izany

dia ny hafalianay sy ny fijalianay,

ny asanay sy ny hevitray ary ny vavakay

mba ho famantarana ny fitiavanay anao.

Amen.

Hira fihobiana ny Eokaristia sy vavaka

Andriamanitra ô, namelanao ny fahatsiarovana ny fijalianao izahay amin’ izao Sakramenta misy ny Vatanao sy ny Ranao izao, koa enga anie ho fatrapanaja izany mistery izany izahay mba handrenesanay lalandava ny vokatry ny fanavotanao anay. Fa Ianao Andriamanitra velona sy manjaka amin’ny taona mandrakizay. Amen.

Aorian’ny tsodrano

F/ Hanome voninahitra ny Tompo

            mandrakizay na aiza na aiza - / Hanome...

A/ Eo am-bavako lalandava ny fiderana Azy * Mandrakizay…

A/ Mankalazà ny Tompo miaraka amiko ianareo rehetra * Mandrakizay…

A/ Deraontsika rehetra ny Anarany * Mandrakizay…

            Voninahitra anie ho an’ny Ray sy ny Zanaka sy ny Fanahy Masina

F/ Hanome voninahitra…

5. Manatòna ahy izay mangetaheta

Tsy misy loharano hafa an-koatran’ny Fon’i Jesoa. Loharano velona izy ka mankahery, miboiboika hanjary fiainana mandrakizay (Léon Dehon).

Fanaingana

« Tamin’ny andro lehibe famaranana ny fety, dia nitsangana i Jesoa ka niantso hoe : Raha misy mangetaheta, aoka izy hanatona Ahy ka hisotro. Fa hisy onin-drano velona hiboiboika avy ao anatin’izay mino Ahy, araka ny voalazan’ny Soratra Masina. Ny Fanahy horaisin’izay hino azy no nambarany tamin’izany ; fa tsy mbola nomena ny Fanahy, satria tsy mbola niditra tamin’ny voninahiny i Jesoa » (Jo 7,37-39).

Vavaka iombonana (Iz 12,1-6)

Midera anao aho, ry Tompo, fa tezitra Ianao,

nefa nihodivitra ny hatezeranao,

ka mampionona ahy Ianao.

Inty ny Andriamanitry ny fahafahako ;

matoky aho, fa tsy manan-tahotra ;

fa ny heriko sy fiderako, dia ny Tompo,

Izy no famonjena ahy teo.

Hanovo rano an-kafaliana ianareo

amin’ny loharanom-pamonjena,

ary izao no holazainareo amin’izany andro izany :

Miderà ny Tompo, miantsoa ny Anarany ;

torio amin’ny firenena ny asany lehibe,

ataovy antso avo, fa tafasandratra ny Anarany

Mihirà ho an’ny Tompo fa nanao zava-mahagaga Izy ;

ka aoka ho fantatra any amin’ny tany rehetra izany !

Miantsoa mafy, manaova firavoravoana

ry ianao mponina any Siona,

fa lehibe eo afovoanao, ilay Masin’Israely ! 

Mba ivavahana sy andinihana mandritra ny Fitsaohana

Jo 4,5-15 : Omeo amin’izany rano izany re aho

Ez 47, 1-12 : Nisy rano nivoaka avy ambanin’ny tokonan’ny trano

Eks 17,1-7 : Hikapoka ny vatolampy ianao, dia hivoaka rano

Sal 41-42 : Mangetaheta an’Andriamanitra ny fanahiko

Torohevitra momba ny hira

Sambatra izay noana – FV 276 ; VH 278 ; VIA 97

Rano miboiboika – FV 44 ; VH 399 ; VIA 136

¢Lay niteraka antsika indray – FV 140 ; VH 505 ; VIA 433

Alohan’ny tsodrano: fanolorantena

Ry Jesoa Kristy,

ny fijalianao no nahazoanao ilay Batemy izay nirinao fatratra.

Novesaran’ny fahorianay tokoa Ianao

no nanolotra ny tenanao tsy nanan-tsiny.

Ny ferinao no nahazoanay fahasitranana ;

ary ny sitrakao natao sorona no nanamasinana anay.

Feno ny Fanahy Masina Ianao no nanolotra ny Ray ny tenanao

amin’ny maha-Mpisorona mandrakizay anao.

Indro izahay mibanjina amim-pinoana ny Lanivoanao misokatra

izay ivoahan’ny Rano mahavelona hahalonaka ny tany efitry ny fiainanay,

sy ilay Ra Fanekem-pihavanana mandrakizay.

Ry Zanakondrin’Andriamanitra tsy misy tsiny,

fatra-pitia anay sy mpanala ny fahotan’izao tontolo izao ô,

mba ampiraiso amin’ny soron’ny tenanao ny fiainanay manolo-tena.

Ry Mpiandry ondry tsara izay nanolo-tena ho anay ondrinao ô,

mba ataovy halainay tahaka Ianao

eo am-panompoana ireo mpiray tampo aminay

ho fampiraisana ny Eglizinao.

Hamasino amin’ny fahamarinanao izahay

ary tahirizo amin’ny Anaranao.

Fenoy ny fitiavana izay nitiavanao anay izahay

mba hinoan’izao tontolo izao sy hiainany

ho voninahitry ny Ray mandrakizay. Amen.

Hira fihobiana ny Eokaristia sy vavaka

Ry Andriamanitra izay nanavotra ny olombelona rehetra tamin’ny alalan’ny misterin’ny Pakan’i Kristy ô, arovy ao aminay ny asan’ny fitiavanao. Ary enga anie izahay mba ho afa-mankalaza ny misterin’ny famonjena anay amim-pinoana marina hiotazanay ny vokatr’izany. Amin’ny alalan’ i Jesoa Kristy Tomponay. Amen.

Fihobiana aorian’ny tsodrano

F/ Omeo fo vaovao izahay, ry Tompo,

            asio fanahy vaovao ao anatinay, ry Tompo - / Omeo...

A/ Raha misy mangetaheta, aoka izy hanatona ahy ka hisotro – F/ Omeo…

A/ Hataoko ao anatinareo ny Fanahiko ka ho velona ianareo – F/ Omeo…

            Voninahitra anie ho an’ny Ray sy ny Zanaka

            sy ny Fanahy Masina - F/ Omeo…

 6. Mpanompon’ny Fanjakana tahaka azy isika

Tokana ihany ny asa dia ny mitia amin’ny fotoana rehetra, na aiza na aiza misy anao, na manao ahoana na manao ahoana toe-javatra misy (Léon Dehon).

Fanaingana

Ny Rain’i Jesoa Kristy Tompontsika, Andriamanitra be voninahitra, no nifidy antsika, ary nanokana antsika mba hitory ny Evanjeliny izay nampanantenainy rahateo tamin’ny alalan’ny Mpaminany ao amin’ny Soratra Masina, momba ny Zanany izay nateraky ny taranak’i Davida araka ny nofo, ary naseho tamin-kery ho Zanak’Andriamanitra tamin’ny fitsanganan’ny maty. Izy no nandraisantsika ny fahasoavana sy ny maha-apostoly antsika mba hampanaiky ny jentily rehetra ny finoana, amin’ny Anarany » (cf Rom 1,1-5).

Vavaka iombonana (Ef 1,2-11)

Isaorana anie Andriamanitra, Rain’i Jesoa Kristy Tompontsika,

izay nitsodrano antsika tao amin’i Kristy,

amin’ny tsodrano rehetra ara-panahy any an-danitra,

sy nifidy antsika tao aminy, talohan’ny nahariana izao tontolo izao

mba ho masina sy tsy manan-tsiny eo anatrehany isika,

ary nanendry antsika rahateo tamim-pitiavana araka ny sitraky ny fony,

mba ho zanaka hatsangany amin’ny alalan’i Jesoa Kristy isika ;

nampamirapiratra ny voninahitry ny fahasoavany izany

dia ny fahasoavany nanasoavany antsika ao amin’Ilay malalany.

Izy no ahazoantsika ny fanavotana amin’ny Rany,

sy ny famelana ny fahotantsika, araka ny haben’ny fahasoavany

izay nomen’Andriamanitra be dia be ho antsika

tamin’ny fahendrena amam-pahalalana rehetra

fa nampahafantariny antsika ny lahatra lalin’ny safidim-pony,

izay nofidin’ny hatsaram-pony hotanterahiny, rehefa feno ny andro :

dia ny hanakapohana ny zavatra rehetra ho iray ao amin’i Kristy

na ny any an-danitra, na ny ety an-tany.

Mba ivavahana sy andinihana mandritra ny Fitsaohana

Mk 10,41-45 : Ny mba hanompo no nahatongavako

1 Ko 9,19-27 : Nilatsaka ho mpanompon’ny olona rehetra aho

Iz 49, 1-7 : Mpanompoko ianao

Torohevitra momba ny hira

Mba sambatra e izay mitia manompo – FV 83 ; VH 554 ; VIA 141

O ry Jesoa Kristy Tompo ô (and. 4.5) – FV 186 ; VH 525 ; VIA 490

Tiako ny hiaraka aminao, Jesoa (and. 2.3) – FV 433 ; VH 652 ; VIA 376

Nifidy ahy ny Tompo – FV 104 ; VH 522 ; VIA 196

Alohan’ny tsodrano: fanolorantena

Ry Jesoa Tompo ô,

nahafoy ny tenanao manontolo mba ho faty ho anay Ianao.

Ho valin’izany fahafoizanao tena izany,

dia te-hanaraka ny lalan’ny Fitiavana izahay anio.

Te-ho tia sy hanompo anao eo amin’ny namanay izahay

ary te-hiaraka hiroso ho any amin’ny Ray

eo am-panehoana hafaliana sy fankasitrahana azy ireo

noho ny fitiavany anay sy noho ny fanampiany anay.

Hamela ny fahaleman’izy ireo izahay

fa indrindra hivavaka sy hiasa ho famonjena azy ireo.

Ankasitraho re izao fanolorana ataonay izao

ary ampiraiso amin’ny Sorona atolotra tsy an-kijanona amin’ny Ray

mba ho famonjena ny olona navotanao.

Amen.

Hira fihobiana ny Eokaristia sy vavaka

Mba ekeo hankalaza araka ny tokony ho izy ilay Zanakondry natao sorona ho anay izahay ry Andriamanitra Tomponay. Amin’izay dia ho afa-kibanjina Azy ao anatin’ny zava-dalin’io mistery io izahay rehefa hasehony miharihary ny fandreseny. Amin’ny alalan’i Kristy Tomponay. Amen.

Fihobiana aorian’ny tsodrano

A/ Ianao no lalana, fahamarinana ary fiainana,

            Ry Jesoa, Zanak’Andriamanitra. - / Ianao...

F/ Izay te-hahita ny Ray dia mandalo ao aminao, * Ry Jesoa…

F/ Ianao no mahatarika azy

            ho amin’ny hafaliana tsy misy fetra, * Ry Jesoa…

            Voninahitra anie ho an’ny Ray… A/ Ianao...

7. Mianara amiko fa malemy fanahy sy manetry tena ao am-po aho

Ny lova sarobidy indrindra omeko anareo dia ny Fo Masin’i Jesoa. Loharanom-pitiavana tsimaintsy hanjaka eto amin’izao tontolo izao (Léon Dehon).

fanaingana

« Fa ho amin’izany no niantsoana antsika : Nijaly ho famonjena antsika i Kristy ary namela ny ohatra nomeny ho antsika, mba hanarahantsika ny diany » (cf 1 P 2,21).

vavaka iombonana: fibanjinana ny fitiavan’i kristy

Ry Jesoa Tompo ô,

omeo anay ny fahasoavanao

hahaizanay mibanjina ny Fonao

sy hahitanay fahamasinana ao Aminao.

Ianao no Ilay Masin’Andriamanitra, Zanakondry tsy misy pentina,

Olo-marina tsy nahalala ota.

Tamim-pahatsorana ombam-pahazavana

narahim-pitiavana tsy nandiso fanantenana,

no niainanao ny sitrapon’Andriamanitra ho an’ny olombelona.

Mba ho famonjena anay sy ho Voninahitry ny Ray,

dia tsy nitsaha-nieritreritra Ianao, niasa ary nitia.

Ianao no lohan’ny olom-baovao :

Koa tariho amin’ny lalan’ny fahadiovam-po izahay,

ampianaro hanompo am-pifaliana,

mba hahatonga ny Fanjakan’Andriamanitra,

eo amin’ny fiainana andavanandro.

Ny fanambinanao anie hambomba anay mba hanarahanay Anao :

amin’ny fananana fo mba hitia, vatana mba hanompo,

sitrapo mba hanatanteraka izay rehetra iandrasan’ny Ray aminay.

Ry Jesoa Tompo, mamindrà fo aminay,

noho ny hatsaram-ponao. Amen.

Mba ivavahana sy andinihana mandritra ny Fitsaohana

Mt 11,25-30 : Mianara amiko…

1 Ko 1,17,31 : Izay ataon’izao tontolo izao ho adala no nofidin’Andriamanitra

Sal 130 : Toy ny zaza vao notazana eo am-pofoan-dreniny

Torohevitra momba ny hira

Ento ny jiogako – FV 166 ; VH 365 ; VIA 205

Tiako ny hiaraka aminao, Jesoa – FV 433 ; VH 652 ; VIA 376

Aoka tsy hatahotra na hangorohoro – FV 234 ; VH 291 ; VIA 129

Izay manaraka Azy Tompo – FV 436 ; VH 354 ; VIA 155

Alohan’ny tsodrano: fanolorantena

Mankasitraka Anao izahay, ry Andriamanitra Rainay,

fa nandefa ho anay ny Fanahin’i Kristy Zanakao Ianao,

mba hahatonga anay

ho mpitondra ny teny ombam-bavaky ny vahoakanao, miaraka Aminy.

Miombona amin’Izy Zanakao izahay,

no manolo-tena sady mitalaho Aminao ho famonjena ny namanay.

Irinay tokoa ny hitondra eo anolohanao ny jiogan’ireo tra-pahoriana,

toy ny nataon’i Kristy niara-nihinana tamin’ny mpanota.

Amparo ny tananao, ry Tompo,

ka aoka ny tombokasen’ny Hazofijalianao hanentana ny fiainanay.

Mamelà ny helokay, ry Tompo ;

eny, na dia lehibe hoatran’inona aza izany.

Koa ny famindram-ponao anie hanenika ny olo-marina sy ny meloka,

hirotsaka amin’ny mahantra sy ny malahelo,

hanarina ireo tia setrasetra sy ireo enjehina.

Tompo ô, mamindrà fo aminay, ka henoy izahay.

Havaozy ny fonay ; ka ho sitrakao anie ny hijoroanay eo anoloanao.

Ampio izahay ho sorona mendrika Anao mandrakariva,

ka ho toy ny mofo sy divay navahana atolotra Anao,

mba ho tonga any amin’ireo mitakiky anatin’ny haizina

sy ny aloky ny fahafatesana anie

ny fanjakam-pahasoavana sy famindrampo avy Aminao.

Amen.

Hira fihobiana ny Eokaristia sy vavaka

Enga anie, ry Tompo, izao Sakramenta tsangambaton’ny fitiavana izao hampiredareda ny fitiavana masina ao am-ponay, hany ka rehefa voasintona mandrakariva hanatona ny Zanakao izahay dia hiezaka hahita Azy koa ao amin’ny namanay. Fa Izy velona sy manjaka amin’ny taona mandrakizay. Amen.

Fihobiana aorian’ny tsodrano

F/ Ao aminao ny loharanon’ny fiainana

            Hitanay ilay hazavana, noho ny fahazavanao - / Ao aminao...

A/ Sarobidy loatra ny fitiavanao, ry Tompo * Hitanay…

            Voninahitra anie ho an’ny Ray sy ny Zanaka

            sy ny Fanahy Masina – F/ Ao aminao…

8. Rehefa tafasandratra hiala amin’ny tany aho, dia hitarika ny olon-drehetra hanatona ahy

Aoka isika samy  hitondra amin-jotom-po ny hazofijalian’ny faharetana, ny fahafoizan-tena, ny fanaovan-tsorona ny tena ho an’ny asan’ny Fon’i Jesoa (Léon Dehon).

Fanaingana

« Tsy nisy niakatra tany an-danitra afa-tsy izay nidina avy tany an-danitra ihany, dia ny Zanak’olona. Tahaka ny nanandratan’i Moizy ny bibilava tany an’efitra no tsimaintsy hanandratana ny Zanak’olona koa, mba tsy ho very izay rehetra mino azy, fa hanana ny fiainana mandrakizay. Izay mino ny Zanaka no manana ny fiainana mandrakizay, fa izay tsy mino ny Zanaka dia tsy hahita ny fiainana, fa hitoeran’ny hatezeran’Andriamanitra » (Jo 3,13-15.36).

Vavaka iombonana « En cor illud »- Thesaurus precum scj

Ry Jesoa Tompo ô,

mino ny Fitiavanao izahay,

ary tianay ny hanana fanahy mahay mankasitraka,

mba hahita ny fomba isehoanao,

ka ho vonona hanoina ny antsonao hatrany.

Raiso ary ataovy lavorary

ny ezakay hamaly ny antsonao amin’ny alalan’ny fitsaohana,

sy fankasitrahana ary fitiavana,

mba ho iray bebe kokoa hatrany

amin’ny fanoloran-tena ombam-panonerana ataonao izahay.

Velomy amin’ny finoana velona

mifototra amin’ny fitiavana izahay sy ireo mpiara-belona aminay,

mba hiainanay sy hijoroanay ho vavolombelona,

hanambara ny Fitiavanao lavorary.

Amen.

Mba ivavahana sy andinihana mandritra ny Fitsaohana

Jo 12,20-33 : Raha tsy maty ny voam-bary nafafy…

Fan 21,4-9 : Izay hijery azy dia velona

Jo 19,17-22 : Nofantsihany Izy

Sal 131 : Aza manifika ny tavan’ny Voahosotrao

Torohevitra momba ny hira

Rehefa tafasandratra – FV 332 ; VH 335 ; VIA 91

Ny voa nafafy – FV 260 ; VH 323 ; VIA 161

Mba ho fantatr’izao tontolo izao e – FV 144 ; VH 440 ; VIA 241

Indray hariva izay – FV 109 ; VH 509

Ry Rainay an-danitra ao – FV 462 ; VH 738 ; VIA 471

Alohan’ny tsodrano: fanolorantena

Mitsaoka anao izahay, ry Jesoa Tompo,

fa ianao nanafaka anay tamin’ny Hazofijalianao masina.

Fitoeram-pampihavanana tokoa ilay Hazo sarobidy

fa izy mihitsy no ihaonan’Andriamanitra Ray sy ny olombelona mpanota.

Koa misaotra, mankasitraka, mankatelina Anao izahay

noho ny nanavotanao anay

sy ny nanomezanao tombon’andro

hahafahanay handinika

momba ny misterin’ny nijalianao sy ny nahafatesanao

ary ny nitsangananao velona tamim-boninahitra lehibe.

Ary ho marim-pisaorana anao

dia atolotray anao ny fiainanay manontolo

fa indrindra ny fonay olombelona osa sy malemy.

Mba omeo fo tsy voazara na miefitrefitra izahay

fo vonon-kanao sorona ny zava-drehetra,

manaraka ny ohatra omenao, miaritra ny fijaliana rehetra,

miasa sy mirotsaka an-tsehatra, mahafoy ny zava-drehetra,

manome ny ainy aza

ho voninahitry ny Ray,

ho fitiavana Anao be indrafo sy ho famonjena ny olombelona.

Ataovy mahay mitandrina ny sitrapon’ny Ray izahay

ary mba omeo fikasana hanaiky ny asan’ny Fanahy Masina

mba ho tonga tolotra madio ao amin’ny Fitiavanao

ny fiainanay manontolo. Amen.

Hira fihobiana ny Eokaristia sy vavaka

Mino izahay ary miaiky fa i Jesoa Zanakao naterak’i Maria Virijiny ho anay, nofantsihana tamin’ny Hazofijaliana ho anay dia velona ao amin’ny Sakramentan’ny Eokaristia ; koa ataovy mahita famonjena lalandava ao amin’izany loharanom-pahasoavana masina izany izahay. Amin’ny alalan’i Jesoa Kristy Tomponay izany. Amen.

Fihobiana aorian’ny tsodrano

F/ Ry Kristy ô, Ianao ilay Zanak’Andriamanitra velona

* Aleloia, aleloia ! - / Ry Kristy...

A/ Tafatsangan-ko velona * Aleloia, aleloia !

            Voninahitra anie ho an’ny Ray sy ny Zanaka

            sy ny Fanahy Masina F/ Ry Kristy ô…

9. mitomoera ato anatiko

Fitokisana sy fitiavana no hisandratrako mankamin’Andriamanitra. Na dia feno heloka bevava aza ny ao anatiko ao, dia tsy hahavery fitokisana ahy velively izany (Léon Dehon).

Fanaingana

« Mitomoera ao amiko, ary izaho hitoetra ao aminareo. Fa ny sampana izay tsy miray amin’ny foto-boaloboka tsy mahazo mamoa ho azy, ary toy izany koa ianareo raha tsy mitoetra ao amiko. Izaho no foto-boaloboka, ary ianareo no sampany. Izay mitoetra ao amiko sy itoerako no mamoa be, satria raha tsy izaho dia tsy mahefa na inona na inona ianareo » (Jo 15,4-5).

Vavaka iombonana: fanokanantena amin’i Fon’i Jesoa (Leon XIII)

Ry Jesoa mora fo indrindra, Mpanavotra ny olombelona rehetra ô,

mba topazo maso miantra izahay miankohoka eto anatrehanao.

Anao izahay ary sitrakay izany ;

fa mba hahamafimafy kokoa ny firaiketanay Aminao,

dia inty izahay anio samy faly manokan-tena amin’ny Fonao Masina.

Betsaka ny olona tsy mahalala Anao,

betsaka koa ny manaratsy Anao sady mandika ny didinao ;

mba mamindrà fo amin’izy rehetra, ry Jesoa,

ary tariho hiditra ao anatin’ny Fonao masina izy.

Tompo ô, mba anjakao daholo ny kristianina mbola tsy nisaraka taminao ;

anjakao koa ireny zaza mpandany nandao Anao ireny,

ary ampodio faingana any an-tranon-drainy izy

sao matin’ny fahoriana sy ny hanoanana.

Anjakao izay voafitaky ny fampianaran-diso

na izay tsy nifanara-kevitra tamin’ny Eglizy ka nisaraka taminy ;

avereno amin’ny lalan’ny marina sy amin’ny finoana tokana izy,

mba tsy hisy afa-tsy vala tokana sy mpiandry ondry tokana.

Ary anjakao koa ireny mbola manompo andriamanitra tsy izy ireny ;

esory amin’ny maizina izy,

ka ampodio amin’ny fahazavana sy amin’ny Fanjakan’Andriamanitra marina.

Tompo ô, vonjeo ny Eglizinao, ampiadano izy, ary afaho amin’izay manampona azy.

Ataovy mandry fehizay sy milamina tsara ny firenena rehetra,

Ary aoka hanako eran’ny tany aman-danitra izao teny tokana izao :

« Voninahitra anie ho an’ilay Fo Masina mamonjy antsika ;

dera sy laza anie ho Azy mandrakizay alaovalo. Amen ! »

Mba ivavahana sy andinihana mandritra ny Fitsaohana

Jo 8,31-59 : Tsy mahay mihaino ny Teniko ianareo

Iz 5,1-7 : …voaloboka no nantenaiko ho voany…

Iz 1,2-20 : Namelon-jaza aho, kanjo izy ireo niodina tamiko

Torohevitra momba ny hira

Raha te-ho sambatra ianao – FV 168 ; VH 359

Kristy velona, Kristy Zanaka – FV 294 ; VH 695 ; VIA 261

Vonona aho, Tompo – FV 372 ; VH 751

'Zaho no tena foto-boaloboka – VIA E15

Alohan’ny tsodrano: fanoloran-tena

Ray Masina ô,

tao amin’ny Zanakao malalanao no nanavotanao izao tontolo izao.

Nampandraisanao anjara

tamin’ny fahafatesany sy ny fitsanganany ho velona

ary amin’ny valim-pitiavana anentanany ny Eglizy izahay.

Nantsoinao izahay

mba hanolo-tena hiaraka amin’ny Zanakao,

Koa hamasino amin’ny fahamarinana izahay, amponeno ao Aminy,

dia ho tahaka ny sampana mamoa satria miray amin’ny fototra.

Ataovy miseho amin’ny fiainanay ny fitiavany.

Ka ny fahazavan’ny Teninao anie hanokatra ny lalam-piaiananay

mandra-piarahanay migoka ny fiainanao feno ao amin’i Kristy.

Noho ny ohatra nomeny sy ny fahasoavany,

dia enga anie ho vonona mandrakariva izahay

ka ho fanatitra tahaka an’i Maria mpanompovavinao.

Hahay hitory ny herin’ny famindram-ponao anie izahay

ka hiasa mba hahatonga ny Fanjakanao. Amen.

Hira fihobiana ny Eokaristia sy vavaka

Ry Andriamanitra Rainay ô, mitsaoka anao izahay noho ny zava-dehibe tanterahinao ho anay ao amin’i Jesoa Kristy Zanakao izay banjininay sy tsaohinay amin’ity Sakramenta mahagaga ity. Enga anie izahay tsilovin’ny Fanahinao Masina, mba hiaiky fa voaantsonao hitory ny Vaovao Mahafaly sy hijoro ho vavolombelon’ny Fitiavanao. Ampiraiso àry ny fanoloranay tena amin’ny soron’ny Zanakao mba ho voninahitrao sy ho famonjena anay. Fa Izy velona sy manjaka miaraka aminao sy ny Fanahy Masina mandrakizay mandrakizay. Amen.

Fihobiana aorian’ny tsodrano

F/ Jereo ny hanoananay, ry Mpanavotra an’izao tontolo izao

* Zarazarao aminay ny teninao sy ny mofonao / Jereo...

A/ Izaho no ilay mofon’ny fiainana :

            izay manantona ahy dia tsy ho noana na oviana,

            izay mino ahy tsy hangetaheta na oviana * Zarazarao…

A/ Izay mihinana ny nofoko sy misotro ny rako

            no manana ny fiainana mandrakizay

            ary Izaho hanangana azy amin’ny andro farany F/ Jereo…

Litanian’ny Fo Masin’i Jesoa

Mpitarika : Ry Fon’i Jesoa, Zanaky ny Ray mandrakizay,

Daholo : - Ambarao ny olona rehetra ny Ray.

Ry Fon’i Jesoa, noforonin’ny Fanahy Masina tao an-kibon’i Maria Virijiny,

- Arotsahy ao am-ponay ny Fanahy Masina mba hanova azy ho endrikao.

Ry Fon’i Jesoa, iray tanteraka amin’ny Tenin’Andriamanitra,

- Hamafiso ny firaisanay Aminao.

Ry Fon’i Jesoa, ambony indrindra,

- Hankalaza sy hidera Anao mandrakariva sy amin’ny fotoan-drehetra anie izahay.

Ry Fon’i Jesoa, Tempoly masin’Andriamanitra.

- Ampio izahay hivoatra hatrany noho ny Batemy noraisinay, ka ho Tempolin’Andriamanitra.

Ry Fon’i Jesoa, fitoeran’ny Avo indrindra.

- Enga anie izahay ho fitoeranao, ka hahafahan’ny hafa mahita Anao.

Ry Fon’i Jesoa, Tranon’Andriamanitra sy Varavaran’ny lanitra,

- Ento any an-danitra any amin’ny toerana hiarahanay mandrakariva Aminao izahay rehetra.

Ry Fon’i Jesoa, mivaivain’ny fitiavana,

- Doroy amin’ny afom-pitiavanao ny tany tontolo.

Ry Fon’i Jesoa, fonenan’ny rariny sy ny fitiavana,

- Ataovy tsapanay fa tia anay Ianao.

Ry Fon’i Jesoa, feno fitiavana sy hatsaram-po,

- Ampitomboy ao am-ponay ny fitiavana feno fangorahana.

Ry Fon’i Jesoa, niangonan’ny hatsaram-panahy rehetra,

- Arotsahy ao am-ponay ny tsimok’izany hatsarana izany, mba hahatonga anay ho tena mpianatrao.

Ry Fon’i Jesoa, mendrika hoderaina,

- Enga anie izahay hidera Anao hatrany amin’ny fahamasinam-piainana.

Ry Fon’i Jesoa, mpanjaka sy iorenan’ny fo rehetra,

- Aoreno ao amin’ny fon’ny olombelona rehetra ny Fanjakan’ny fitiavanao.

Ry Fon’i Jesoa, itoeran’ny rakitry ny fahendrena sy ny fahaizana rehetra,

- Ataovy miraikitra lalina ao anatinao izahay, hahazoanay tsaratsara kokoa hatrany ny Teninao.

Ry Fon’i Jesoa, fonenan’ny hafenoan’Andriamanitra,

- Ampahafantaro ny olon-drehetra fa Zanaky ny Ray mandrakizay Ianao, ary Andriamanitra tokana miaraka Aminy ao amin’ny Fanahy Masina.

Ry Fon’i Jesoa, nahafa-po ny Ray,

- Hamasino ny asanay tsirairay, ho mendrika ka hankasitrahan’ny Ray any an-danitra.

Ry Fon’i Jesoa, Tompon’ny hafenoana mirotsaka aminay rehetra,

- Arotsahy ao am-ponay ny hafenoan’ny fahamasinana amam-pitiavanao.

Ry Fon’i Jesoa, itodihan’ny havoana hatrizay ka ho mandrakizay,

- Areheto ao am-ponay ny faniriana hahita Anao, ka hifanatrika ary hiara-monina Aminao.

Ry Fon’i Jesoa, manam-paharetana sy mpamindra fo,

- Ataovy tsapan’ny mpanota rehetra ny halehiben’ny famindram-ponao, ka hotadiaviny hatrany anie ny famelan-keloka ao Aminao.

Ry Fon’i Jesoa, rakitsoa ho an’ireo mitaraina Aminao,

- Ekeo ny vavakay aminao izao, mba ho tonga anie ny Fanjakanao.

Ry Fon’i Jesoa, loharanon’ny fahamasinana,

- Mba hivelomanay anie ny fiainan’Andriamanitra niainanao, ary fenoy ny fahamasinanao izahay.

Ry Fon’i Jesoa, ho Solohelokay,

- Sasao amin’ny Ran’ny Fonao izahay ho afaka amin’ny otanay sy ny an’izao tontolo izao.

Ry Fon’i Jesoa, tototry ny fihizingizinana tsy marina,

- Ampianaro izahay hanaraka Anao amin’ny lalan’ny fanetren-tena sy hanaiky hietry toa Anao.

Ry Fon’i Jesoa, montsana noho ny fahotanay,

- Atanjaho ny fonay hibebaka noho ny fahotanay.

Ry Fon’i Jesoa, nanaiky hatramin’ny fahafatesana,

- Hatramin’ny fahafatesana teo amin’ny Hazofijaliana no namonjenao an’izao tontolo izao, koa herezo izahay hanaiky hatrany sy hamonjy izao tontolo izao amin’ny alalan’ny fahaizanay manaiky.

Ry Fon’i Jesoa, gorobaky ny lefona,

- Arotsahy aminay, avy amin’ny fonao misokatra, ny sakeli-pahazavana, ary ny hery sy fahasoavana.

Ry Fon’i Jesoa, iavian’ny fanalana alahelo rehetra,

- Enga anie Ianao no ho fifaliana azo antoka, sy ho fanalana alahelo mahatoky ho anay.

Ry Fon’i Jesoa, fiainana sy fitsangananay ho velona mandrakizay,

- Atsangano ho amin’ny fiainam-pahasoavana ireo olona rehetra manalavitra izany.

Ry Fon’i Jesoa, soron’ny mpanota,

- Avereno ao amin’ny fitiavanao izy rehetra.

Ry Fon’i Jesoa, vonjin’izay manantena Anao,

- Manantena Anao izahay, ka arovy amin’ny ratsy rehetra, ary omeo ny fitiavanao.

Ry Fon’i Jesoa, mahafatifaty ny olomasina rehetra,

- Hafalianay any an-danitra Ianao ; koa enga anie ho maminay dieny ety an-tany.

* Izany no angatahinay amin’ny Fonao ry Jesoa, dia Ianao izay velona sy manjaka amin’ny taona mandrakizay.

Amen.